⼆月百家春——讀劉克襄〈狗尾草〉 ◎陳這

 

⼆月百家春——讀劉克襄〈狗尾草〉　◎陳這

⠀

當春芳草地，萬物皆獻媚

火to燒盡，香烌宛然kā命途顯明。平安

　⠀

我歇tī刺phè內底，聽候lín照約束，bē記得

刺leh烏溪⽔⾯我ê名字。狗尾草弄花時

　⠀

定著會koh抽長，伸lûn，lán ê影

欲蔭過下跤lán蝹蜷ê神魂

　⠀

Lín ê囝，緊早慢伊會當了解

Hōo我慒⼼擘腹ê問題，徛算有智慧佮憐憫

　⠀

性命ê崩敗和損蕩kám就會堪得？橋頂

He hiàm喝sau聲--ê是我，雲絲jû-sù風tng leh滾絞。慈悲

　⠀

天地是 án-ni，疼--過，猶原恬靜落來

出對tse無thang拆明ê問題，無ta-uâ

　⠀

我kā烏⿇暫且mua--leh。Lán ê囝，伊若徛tī光焱ê所在

⼆月透朔風，我亦當做夢來去

　⠀

⠀

◎作者簡介

　⠀

陳這，2000年尾出生，北部的那個木柵人，就讀台大政治系及地理系。最近在寫台語詩及小說，偶爾翻譯。期待看到屬於我們時代的新文學典範。

　⠀

⠀

◎小編 #宇軒 賞析

　⠀

目前佇台大政治系佮地理系讀冊的陳這，進前是「臺師大噴泉詩社」的社長。 ​除了詩，對台語足有興趣的陳這猶有咧寫小說、散文佮翻譯，頭殼內有足濟的字詞會當佇創作的時陣予伊選擇，自伊這首詩內底會使看出伊的才情。雖然向陽佇《新世紀新世代詩選》寫「一九八○年以後出世的新世代詩人用本土語言寫詩的人愈來愈少」，不過陳這予阮看著未來的台語詩猶原閣有希望。

　⠀

這首〈二月百家春〉的題目自劉克襄的〈狗尾草〉開始落筆（ https://www.facebook.com/cendalirit/posts/pfbid07PX5DSVbqaBGRMcCtPyCwGy748TwUird9LK4CQb4U4c7nTbngRaK7zmbZ8LRiAaKl ）。〈狗尾草〉拄開始就用「二月」共讀者點拄時間，紲落來就是「我」勻聊仔講一個過去的故事，透過「狗尾草」這個畫面表現出家己「數念過身的朋友」。佇〈狗尾草〉以外，這首〈二月百家春〉內底閣有南管古曲〈百家春〉的故事，予人重新記得過去的歷史。

　⠀

這首詩全部有七組的「兩行詩」，毋過每一組攏毋是會當獨立理解的，就是講有時「一句」予拆開成做「兩行」，欲做伙來看才會當知影伊完整的意思——這個「手路」佇華語／華文詩的發展當中予人號做「迴行」，已經有足久的歷史矣。這首詩透過「迴行」的方式，一方面共詩加一个「每一組仝款攏是兩行」的架構，一方面予讀者一種「愛一直讀落去」的心情。

　⠀

自風景開始咧講故事，詩內底的「我」佇第兩組才出現，閣是出現佇「刺phè」（荊棘）內底；我的「名字」猶閣「刺leh烏溪⽔⾯」，會當知影「我」這馬的情形可能已經是過身、變做其他的形體矣。最後一句「⼆月透朔風，我亦當做夢來去」，敢若是佮進前介紹的〈狗尾草〉頭一句「二月冬殘，冷雨仍未過」對話，會使發現陳這咧寫這首詩的時陣，有歷史的意識佮伊背後特別的意義。希望透過這首詩內「我」心慒慒的感覺，會當予閣較濟人知影過去發生的代誌，親像詩內底所講的：「Lín ê囝，緊早慢伊會當了解」。

　⠀

　⠀

美術設計和攝影來源：李昱賢，https://www.instagram.com/ahhsien_/

每天為你讀一首詩 #陳這 #而立之前 #吹鼓吹新世代詩人大展